Saturday, September 30, 2006

ek saal baad

Na jaane kyun aaj ek saal ke baad
Yaad aa raha hai mujhe itnee shiddat ke sath

wo sakul janha gujare meine itne din
Yaad aa raha hai bahut sa saamaan
Jo chhod aaya tha mein vanha
Jinmein shamil tha wo teesra bench

Ek stool computer printer ke aage rakha
Baraamde ki aur khulne wali ek khidki
Jis-se aane wale har ek vidhyarthi ka
Zayja leti thi meri nazar

Koi dilkash sa naam jo hum
Zeene mein lage aaine par bhaap jama likhate the
Mude hue geele filter paper jo
Maine dustbin ke paas faink diye the

Aus ki wo bunde jo har subah
Hari hari ghas par saji pati thni

Chak to chura jo shayampatt ke niche
Ikattha ho jata tha jab madam likhati thi
Kuchh rangeen chak tukade jo hum
Jaan bujh ke niche gira diya karte the

Pustkalay mein angerji ki almaari mein
Rakhi vah dhul bhari kitab jis par likha tha
'Romeo and Juliat'

Wo rang birange scraf jo madam bandh ke aati thi

Sardion mein baalon par jamin aus, jo
Pani ban dhire dhire tapkta tha to
Kuchh gore cheharon ke hont gulabi ho jate the
Ab tak sir ki wo aenak, jo vo
Har vyakhyan ke baad utare karte the
Apni si lagti thi

Pichhwade se udata us aag ka dunwa jo
Thithurti thand se bachane ke liye chapdaasi jalate the
Wo kagaz ke rangeen, jin se sajaee thi humne apni class

Aur sabse badhkar us jaaduee ghanti ki awaaj
Jo yun to roj khush kar deti thi, per akhari bar
Na jaane kyun
Bhari dhup mein bhi aankhe nam chhod gayi thi

Haan, ye sab saamaan mera hai
Sara nahi to thoda thoda
Bas ek ek katra sabka
Bator kar la do mujhe

Aaj mujhe ye sab yaad aa raha hai
Ek saal baad
Badi shiddat ke saath

No comments: